Kinakål
Brassica rapa subsp. chinensis
Kinakål er ein eittårig krossblome som blir dyrka som grønsak. Det er det store, avlange kålhovudet som vi et.
Kjenneteikn
Kinakål er eittårig og set eit stort, avlangt kålhovud med krusete blad med lyse nervar.
Kromosomtal
Kinakål er hovudsakleg diploid med grunntal x = 10 og kromosomtal 2n = 20. Det er i alle fall éi teljing av 2n = 40, dvs. tetraploid. Teljingar er ikkje utførte på norsk materiale.
Økologi og utbreiing
Vi veit ikkje i kor stort omfang kinakål blir dyrka i Noreg. Utanfor kultur er han berre funnen eit par gonger på deponi for organisk avfall, der han sikkert har kome opp frå utkasta matvarer. Funna er i skrivande stund ikkje digitalisert og er difor ikkje synlege i kartet.
Kommentarar
Dette er ein austasiatisk kulturplante, lenge dyrka i Kina og Japan, og det er ikkje klårt for oss korleis ein har kome fram til at han er ein kultivar utvikla frå den elles mediterrane og vestasiatiske arten Brassica rapa, men han blir handsama slik i Plants of the World Online (POWO). I Europa er han ny i kultur, først dyrka i Mellom-Europa frå kring midten av 1900-talet.
Kjelder
Chromosome Counts Database (CCDB). http://ccdb.tau.ac.il/home/ Lasta ned 9/5/2022
Elven R, Bjorå CS, Fremstad E, Hegre H og Solstad H (2022). Norsk flora. 8. utg. Samlaget, Oslo. 1255 s.
Plants of the World Online (POWO). https://powo.science.kew.org/results Lasta ned 3/11/2022
Store norske leksikon/kinakål https://snl.no/kinakål Lasta ned 7/11/2022
Siter nettsida som:
Elven R og Hegre H. Kinakål Brassica rapa subsp. chinensis (L.) Hanelt. www.artsdatabanken.no/Pages/345525. Lasta ned <dag.månad.år>.