Lakksennepslekta
Coincya
Lakksennepslekta er ei nokså lita slekt med sju artar utbreidde i Vest-Europa sørover frå Skottland og Tyskland, i Middelhavsområdet og austover til Pakistan. I Noreg er ho representert med to framande artar no som blygsennep er flytta hit frå kålslekta.
- Innhold
- Forvekslingar
- Siter nettsida som:
Plantane er eitt- til fleirårige, nokså storvaksne urter opptil 50–60 cm. Stengelen er meir eller mindre strihåra med ugreina hår. Blomestanden er ein oftast ugreina klase som strekkjer seg i fruktstadiet. Begerblada er oppstigande til tiltrykte, og dei to indre er sekkforma ved grunnen. Kronblada er bleikgule til gule. Frukta er ei langskulpe der griffeldelen er eit langt nebb. Skulpeveggane har éin eller tre nervar. Frøa sit i éi rekkje i kvart skulperom.
Artar i lakksennep-slekta kan kjennast frå dei andre gule krossblomane med langskulper på følgjande kombinasjon av karakterar: ugreina hår på stengel og blad (skil Coincya frå til dømes gullslekta Erysimum og hundesennepslekta Descurainia), opprette begerblad (skil Coincya frå til dømes vegsennepslekta Sisymbrium og åkersennepslekta Rhamphospermum), flika blad (skil Coincya frå delar av kålslekta Brassica), arr hovudliknande og ikkje kløyvd (skil Coincya frå salatsennepslekta Eruca), kvar skulpevegg trenerva og ikkje éinnerva (skil Coincya frå kålslekta Brassica), kronblad langskafta (skil Coincya frå narresennepslekta Hirschfeldia), og griffeldelen av skulpa er utforma som eit langt, flatt nebb (skil Coincya frå til dømes kålslekta Brassica, mursennepslekta Diplotaxis og vinterkarseslekta Barbarea).
Forvekslingar
Kjelder
Heywood VH, Leadlay EA og Akeroyd JR (1993). Coincya Rouy. I TG Tutin mfl. (red.), Flora Europaea. 1. Psilotaceae to Platanaceae. 2. utg.: 411–412.
Leadlay EA og Heywood VH (1990). The biology and systematics of the genus Coincya (Cruciferae). Botanical Journal of the Linnean Society 102: 313–398.
Plants of the World Online (POWO). https://powo.science.kew.org/results 3/11/2022
Stace CA (2019). New Flora of the British Isles. 4. utg. C & M Floristics, Middlewood Green. 1266 s.
Siter nettsida som:
Elven R og Hegre H. Lakksennepslekta Coincya Rouy. www.artsdatabanken.no/Pages/313782. Lasta ned <dag.månad.år>.