1. Arter på nett
  2. Krossblomfamilien Brassicaceae Burnett

Tårnurtslekta Turritis L.

Forrige Opp Neste
Tårnurt.
Tårnurt Turritis glabra L.

Tårnurtslekta er ei lita slekt med to artar. Slekta er nærskyld med vårskrinneblomslekta. Berre éin av artane finst i Noreg, og det er den heimlege arten tårnurt.

Plantane er toårige, sjeldan fleirårige, blågrøne og snaue øvst eller med ugreina hår, gaffelhår eller uregelrett greina (dendroide). Grunnblada er ofte djupt flika, medan stengelblada er heile og med ein tydeleg stengelomfattande grunn. Klasen strekkjer seg svært sterkt under fruktmogninga, og i frukt er han svært smal med tiltrykte skulpeskaft. Begerblada er opprette. Kronblada er bleikgule, kremkvite eller stundom rosa til bleikt purpur. Frukta er ei flattrykt langskulpe med tydeleg midtnerve på veggane og ei mengd med frø i to rekkjer i kvart skulperom.

Artane i tårnurtslekta har vore inn og ut av den kollektive skrinneblomslekta Arabis. For tida er dei ute att i ei eiga slekt. Avgrensinga av slekta er uklår, men ho er utbreidd i alle tempererte område på den nordlege halvkula, hovudsakleg med arten Turritis glabra. Den einaste andre arten i slekta, Turritis laxa (Sm.) Hayek, er utbreidd i Søraust-Europa og Vest-Asia, innanfor den større utbreiinga til vår art. Han skil seg nokså mykje morfologisk frå Turritis glabra, og det ville ikkje vere overraskande om han landar i ei anna slekt.

Kjelder

Al-Shehbaz IA (2010). Turritis Linnaeus. I Flora of North America Editorial Committee (red.), Flora of North America north of Mexico. 7. Magnoliophyta: Salicaceae to Brassicaceae: 458.

Elven R, Bjorå CS, Fremstad E, Hegre H og Solstad H (2022). Norsk flora. 8. utg. Samlaget, Oslo. 1255 s.

Jones BMG og Akeroyd JR (1993). Arabis L. I TG Tutin mfl. (red.), Flora Europaea. 1. Psilotaceae to Platanaceae. 2. utg.: 352–356.

Plants of the World Online (POWO). https://powo.science.kew.org/results Lasta ned 9/12/2022

Rich TCG (1991). Crucifers of Great Britain and Ireland. BSBI Handbook 6. Botanical Society of the British Isles, London. 338 s.

Stace CA (2019). New Flora of the British Isles. 4. Utg. C & M Floristics, Middlewood Green. 1266 s.

Siter nettsida som:

Elven R og Hegre H. Tårnurtslekta Turritis L. www.artsdatabanken.no/Pages/313818. Lasta ned <dag.månad.år>.