Ekspertpanel – gjer kunnskap raskare tilgjengeleg

Frå 2025 blir risikovurderinga av dei ulike artsgruppene i Framandartslista fordelt over ein periode på fem år, og vurderingane blir no oppdaterte når ny kunnskap kjem til. Det er og lagt til rette for at nye framande artar kan vurderast når som helst.

Dette er ei endring frå tidlegare ordning, der alle artar blei risikovurderte i løpet av om lag eit år, og det gjekk fleire år mellom kvar gong ei art blei revidert.

Mål om å redusere spreiinga

Årsaka til omlegginga er at endringane i naturen skjer raskt. Skal Noreg nå nasjonale og internasjonale mål om å redusere spreiinga av framande artar, må kunnskapen vere oppdatert til ei kvar tid.

Med aukande global handel og eit varmare klima får stadig fleire framande artar fotfeste i Noreg. Dette, og dessutan større fokus på dørstokkartar, aukar behovet for å oppdatere vurderingane oftare enn kvart sjette år.

Kunnskapsinnhenting og kvalitetssikring

Artsdatabanken har oppnemnt eit ekspertpanel som skal oppdatere Framandartslista fortløpande, og slik sikre samfunnet tilgang til oppdaterte risikovurderingar. Panelet gir større rom for innhenting av kunnskap og kvalitetssikring i arbeidet med vurderingane av artane.

Ekspertpanelet har kunnskap om uilike artsgrupper og er sett saman av fagpersonar med solid kompetanse i taksonomi og økologi.

Medlemmane i panelet sit òg ekspertkomiteane som reviderer dei ulike artsgruppene kvart sjette år. Dette bidreg til både kontinuitet og kvalitet i arbeidet over tid.

Vurderingane blir oppdaterte  når ny relevant kunnskap ligg føre – for eksempel ved funn av ein ny framand art i landet.

Artsdatabanken vil framleis publisere ei samla oversikt over alle vurderte artar, slik praksisen er i dag. Neste heilskapelege framstilling kjem etter planen i 2029 og vil få namnet Framandartlista 2029.

Ekspertpanelet

• Katrine Eldegard, Norges miljø- og biovitenskapelige universitet
• Anders Endrestøl, Norsk institutt for naturforskning
• Elisabet Forsgren, Norsk institutt for naturforskning
• Inger Sofie Hamnes, Veterinærinstituttet
• Hanne Hegre, FlowerPower
• Vivan Husa, Havforskningsinstituttet
• Jeroen van der Kooij, Naturformidling van der Kooij
• Björn Nordén, Norsk institutt for naturforskning
• Bård Stokke, Norsk institutt for naturforskning
• Vigdis Vandvik, Universitetet i Bergen
• Gaute Velle, NORCE klima og miljø