Marihandslekta Dactylorhiza

Dei to mest vanlege orkidéane i norsk natur er to artar eller underartar av slekta Dactylorhiza: skogmarihand D. fuchsii eller D. maculata subsp. fuchsii og flekkmarihand D. maculata eller D. maculata subsp. maculata. Tvilen om det er éin eller to artar er typisk for denne slekta; artsavgrensingane er framleis svært uklåre, til tross for mykje arbeid med morfologi og molekylære markørar. Begge desse to er så vanlege at dei gjer det meiningslaust å rekne alle orkidéar som truga. Eit par andre artar eller artsgrupper i slekta er òg vidt utbreidde i Noreg og vanlege å finne.