Russedagfiol Hesperis pycnotricha Borbás & Degen

Russedagfiol er ei to- eller fleirårig urt med opprette stenglar som kan bli 1 m eller meir. Stengel og blad er grissent strihåra med korte, gaffelgreina hår og nokre få ugreina hår, og dei er utan kjertlar. Både grunnblada og stengelblada er smalt lansettforma, spisse og tanna eller heile, og dei midtre og øvre stengelblada er sitjande og med meir eller mindre stengelomfattande grunn. Blomestanden er ein klase som strekkjer seg mykje i fruktstadiet, med noko opprette fruktskaft og frukter. Kronblada er 15–25 mm lange og raudfiolette. Frukta er ei knudrete langskulpe som er noko håra nedst, men snau oppe. Griffelen er lang (1,5–2,5 mm). Arret er djupt toflika. Kvar skulpevegg har éin tydeleg midtnerve. Frøa sit i éi rekkje i kvart skulperom.

Russedagfiol er diploid med grunntal x = 7 og kromosomtal 2n = 14, men det er få teljingar. Teljingar er ikkje utførte på norsk materiale.

Russedagfiol er framand, truleg komen til Noreg med russisk korn og sikkert dokumentert frå berre to stader: i Oslo (utan kjent lokalitet) i 1915 og ved Treschow Fritzøe mølle i Larvik (Vestfold) i 1996.

Russedagfiol er heimleg i Søraust-Europa og Vest-Asia, særleg i områda kring Svartehavet.

Russedagfiol og dagfiol høyrer til same artsgruppe i slekta, og Plants of the World Online (POWO) fører opp namnet Hesperis pycnotricha som eit synonym for Hesperis matronalis, noko korkje vi eller Ball (1993) i Flora Europaea er samde i. I Flora Europaea vert dei handsama innanfor det dei kaller «Hesperis matronalis group», så dei er truleg nærskylde.

Elven R og Hegre H. Russedagfiol Hesperis pycnotricha Borbás & Degen. www.artsdatabanken.no/Pages/345611. Lasta ned <dag.månad.år>.