Ekspertkomiteane 2023

Slik er ekspertkomiteane sette saman

Artsdatabanken sende i desember 2020 ut ein open invitasjon til norske fagmiljø, universitet og naturhistoriske museum om å bidra i arbeidet med å risikovurdere framande artar.

Med grunnlag i CV og kvalifikasjonskrav fastsette av Artsdatabanken vart 58 personar oppnemnde til å delta i arbeidet.

Rekruttering og kompetanseoverføring

For å sikre rekruttering og kompetanseoverføring i komiteane vart det oppretta ein eigen kvote for kvalifiserte nyutdanna ekspertar. Denne gongen er det difor fleire unge med i arbeidet, i tillegg til medlemmer med lang røynsle i å risikovurdere framande artar.

Ekspertane som risikovurderer framande artar til Fremmedartslista 2023, er fordelte på 12 komitear:

• Komiteane har ei brei fagleg samansetjing, med kompetanse innan framande artar, taksonomi og økologi.
• Det er eigne komitear for mellom anna karplantar, pattedyr og fuglar, medan komiteen for terrestriske virvellause dyr dekkjer mange ulike artsgrupper.
• Alle medlemmene har signert ei habilitetserklæring som sikrar at interessekonfliktar eller private omsyn ikkje påverkar vurderingane.

Arbeidet i komiteane 

Kvar einskild komité har ein leiar som er ansvarleg for at vurderingane blir gjennomførte i tråd med retningslinjene.

Artsdatabanken arrangerer oppstartsmøte og arbeidsmøte for dei einskilde komiteane, der det mellom anna blir lagt vekt på vurderingsmetoden. Vi legg òg til rette for å harmonisere arbeidet på tvers av komiteane. I tillegg blir det halde møte internt i komiteane for å standardisere og samordne bruken av retningslinjene.

Kva vurderingane omfattar

Ekspertane vil revidere vurderingane av artane i Fremmedartslista 2018. I tillegg skal fleire hundre nye artar vurderast.

Desse er eit resultat av ei større satsing enn tidlegare på dørstokkartar. Satsinga på dørstokkartar er forankra i Klima- og miljødepartementet sin tiltaksplan frå 2020, Bekjempelse av skadelige fremmede organismer, tiltaksplan 2020–2025.